ما سبب خسارة كهربا قضيته مع الزمالك؟ أمير مرتضى يكشف

كشف أمير مرتضى منصور، المشرف السابق على الكرة بنادي الزمالك، عن سبب خسارة محمود عبد المنعم “كهربا” لاعب الأهلي، قضيته مع ناديه السابق الزمالك.

وقال أمير مرتضى، خلال تصريحات ببرنامج تلفزيوني:«كافئت لاعيبة كتير كنت بقوله هات جون واديك شيك بـ 100 ألف تصرفه بعد الماتش، زي كهربا وأوباما ومصطفى محمد، وكهربا كان لاعب مهم جدًا في فترة 2018، قبل ما يهرب، وفيه حكم محكمة بيقول أنه هرب”.

وأضاف: “هو شاف ان عقده باطل والنادي شاف أن عقده ممتد، وهو كده دي وجهة نظره، ورحنا الفيفا وهو خسر القضية أول درجة، واتحكم ضده بـ 32 مليون جنيه ما يعادل ساعتها 2 مليون دولار، وهو استأنف عشان يقلل المبلغ أو يلغيه، واحنا استأنفنا عشان نزود المبلغ ونحوله بالدولار، والمحكمة الرياضية أيدت حكمنا بـ 2 مليون دولار”.

وأوضح: “أنا اللي عامل القضية من أولها لأخرها، وكهربا طلع في حلقة تليفزيونية مع سيف زاهر والفيديو موجود في القضية، وسأله يا كهربا عقدك فيه قد إيه في الزمالك، وقاله انا عقدي فيه سنتين وجددت سنتين، وسيف زاهر سأله تأكيدًا يعني العقد فيه 4 سنين، قاله آه، وهو اعترف وخسر القضية بسبب الفيديو ده، وكهربا اتحط في ظروف صعبة، خليته يعتمد على نفسه وقوته، معرفش الاهلي وقف جنبه ولا لا”.

وأكد: ‘أنا معترض على حاجة، أنه في الآخر دفع بالمصري، رغم احنا شفنا الدولار كان بيحصل فيه إيه الفترة اللي فاتت، وضرر الزمالك لما كهربا هرب”.

وأتم: “كلف النادي أكتر من 2 مليون دولار، اشترينا بديل له اللي هو محمد اوناجم ب مليون ونص دولار، وبن شرقي ب 400 الف دولار، فالتوتال في التحويلات كان حوالي 2 مليون دولار غير عقود اللاعبين، والموضوع مش انسانيًا، دي حقوق، وقبل ما يمشي قلتله اجدد لك، قالي لا وهعمل شكوى ومن اللحظه دي مش هتشوف ني اي مشكلة، وهرب بعدها على طول”.